அய்யய்யோ....108 ஆம்புலன்சை "அதுக்கு" பயன்படுத்தாதீங்க...

வாக்காளர்களுக்கு பணம் கொடுத்து வாக்குகளை வாங்குவதை கடுமையான குற்றமாக பார்த்து வருகிறது தேர்தல் ஆணையம்.ஒவ்வொரு பகுதியின் எல்லையிலும் வாகனங்கள்  சோதனைக்கு உட்படுத்த படுகிறது. இதுவரை சுமார் முப்பது கோடி ரூபாய் சிக்கியதாக தெரிகிறது. ஆனால்,  புது  புது வழிகளை யோசித்து மக்களுக்கு பணம் கொடுத்து வருகிறார்கள் நம் அரசியல்வாதிகள். அதேநேரம் அவர்களின் வழிகளையெல்லாம் கண்டுபிடித்து அடைத்து வருகிறது தேர்தல் ஆணையம். போலீசாரின் கண்ணில் மண்ணை தூவ தற்போது அரசியல் கட்சிகள் 108 ஆம்புலன்ஸை கையில் எடுத்துள்ளதாக தகவல்கள் வெளியாகியுள்ளன.

ஆம்புலன்சில் சைரனை போட்டுக் கொண்டால் போலீசார் அதனை நிறுத்தி சோதனை செய்வதில்லை. இதனை நல்ல வாய்ப்பாக பயன்படுத்திக் கொண்ட அரசியல் கட்சியினர் வாக்காளர்களுக்கு கொடுக்க ஆம்புலன்ஸ் மூலம் பணம் எடுத்துச் சென்று வருவதாக தற்போது புகார் எழுந்துள்ளது.

வாக்காளர்களுக்கு கொடுக்க ஆம்புலன்ஸ் மூலம் பணம் கடத்தப்பட்டு வருவதாக எழுந்துள்ள புகாரை அடுத்து தேர்தல் ஆணைய அதிகாரிகள் அதிர்ச்சி அடைந்துள்ளனர். இதுகுறித்து விசாரணையில் இறங்கியுள்ளனர். தேவைப்பட்டால், சந்தேகம் வந்தால் 108 ஆம்புலன்ஸ உள்பட அனைத்து ஆம்புலன்களையும் கூட சோதனையிடலாமா என்பது குறித்து அதிகாரிகள் யோசித்து வருகிறார்களாம்.

அய்யா....அரசியல் வாதிகளே....தயவு செய்து ஆம்புலன்ஸை அதுக்கு பயன் படுத்தாதீர்கள். பணம் கொடுக்க வேறு என்ன எலவையாவது பயன்படுத்திக்கொள்ளுங்கள். அது உங்கள் பாடு, தேர்தல்கமிசன் பாடு. அதை விடுத்து  நீங்கள் ஆம்புலன்ஸை பயன்படுத்துவதாக இருந்தால் அதனால் எத்தனை உயிர்போகும் என்பதை நினைவில் கொள்ளுங்கள். நிஜமாகவே ஒருவர் அடிபட்டோ,அல்லது   உயிருக்கு போராடிக்கொண்டிருக்கும்போதோ  அவர்களை அவசரமாக அழைத்துசெல்லும் ஆம்புலன்ஸ்களை நீங்கள் பணம் கடத்துவதாக நினைத்து போலீசார் சோதனையிடும் அந்த 10  நிமிடமோ, 15 நிமிடமோ கால இடைவெளியில் என்னவேண்டுமானாலும் நடக்கலாம். உயிர் போகும் சாத்தியம் கூட உண்டு...

நீங்கள் பணம் கொடுக்க உயிரோடு  விளையாடாதீர்கள். மக்களுக்கு உதவ நீங்கள் தேர்தல் நேரத்தில் காட்டும் ஈடுபாட்டில் ஒரு ஐம்பது  சதவீதத்தை தேர்தலுக்கு பிறகும் காட்டினால் மக்களின் தரம் இன்னும் உயரும்....அதற்காக புது புது வழிகளை யோசியுங்கள். வருங்கால சந்ததியினர் உங்களை வாழ்த்துவார்கள்.